ICYUMWERU CYA GATATU CY’ADIVENTI A

ICYUMWERU CYA GATATU CY’ADIVENTI A
12/12/2004

Iz 35, 1-6a.10
Yak 5,7-10
Mt 11,2-11

«Nimukomeze amaboko yananiwe, mutere imbaraga amavi adandabirana». Ngiyo intero umuhanuzi Izayi azuhuzanyije umuryango w’abemera kuri iki cyumweru cya gatatu cy’adiventi. Nimukomere, mwoye gutinya kandi mwihangane nk’umuhinzi ategereza isarura; iyo ni inama ya mutagatifu Yakobo mu isomo rya kabiri. Ni byo turi mu gihe cyo kwitegura Nyagasani Yezu Kristu, tugomba rero kutarambirwa kandi tukarangwa n’imigenzereze iboneye. Mu ivanjiri, Yohani Batisita yohereje kubaza Yezu niba koko ariwe wagombaga kuza. Igisubizo twacyumvise: Yezu yarababwiye ati nimugende muvuge ibyo mwabonye. Ibyo si ibindi ni iyuzuzwa ry’ubuhanuzi bwa Izayi bukubiye mu isomo rya mbere: impumyi zirabona, ibipfamatwi birumva, abacumbagira baragenda neza, imiragi biravuga…Muri make muntu ariyereka imbere y’Imana kuko izina ryayo ari ritagatifu.
Mu bihe bikomeye by’itotezwa ry’abayahudi ryakozwe n’abanazi, hari abayahudi batekerezaga amwe mu magambo yo muri bibiliya, nk’ayo twateguriwe kuri iki cyumweru, bakaganyira Imana Uhoraho, bati Nyagasani bya bitagangaza wakoreraga ba sogokuru byagiyehe? Kuki waduteye umugongo? Bagatakira Imana basa nabibutsa ko isezerano ryayo ryagombye kwigaragaza no mu magorwa bari barimo. Sitanze urugero ku bayahudi nkaho aribo bari bafite ikibazo cyo gusobanikirwa n’ijambo ry’Imana bonyine ahubwo uwemera wese ashobora kugwa mu gishuko cyo gushaka kubyaza Imana ibitangaza: nonese amayaga yacu ntakeneye imvura? Impumyi, ibiragi, ibipfamatwi, abacumbagurika si benshi? Abihebye n’abo byashobeye ntitwuzuye isi? Yezu twemera ni wowe koko wasezeranijwe amahanga cyangwa dushakashakire ahandi? Dukomeze tukwihambireho uzadukiza cyangwa tuziguruke dutegeshe ahandi?
Intumwa zari zoherejwe na Yohani Batisita, zagombye kuba zitaravunitse mu gusubiza uwari wazitumye kuko ibyo Yezu yakoraga byarirangaga. Nyamara ubanza bitari byoroshye, kuko Yezu yahise abaza abari aho ibibazo bitoroshye: Mwagiye kureba iki mu butayu? Twibuke ko mu butayu ariho Yohani yigishirizaga. Ndibwira yaranababwiriragamo, ati mugenzwa ni iki? Kubona agakiza kagaragaza ikuzo ry’Imana mu bantu cyangwa gutangarira gusa ibigezweho? Yezu azananyuzamo ase n’ubacyurira ati ni imigati mwariye mukijuta ituma munkurikira, aho ni nyuma y’itubura ry’imigati.
Ese ko ubu ari twe tubwirwa, harya tugenzwa ni iki muri Kiriziya y’Imana? Icyo ni ikibazo twabajijwe umunsi tubatizwa, cyangwa se cyabajijwe ababyeyi bacu: aba bana murabasabira iki muri kiriziya y’Imana? Ni ikibazo tubazwa iteka mbere yo guhambwa amasakaramentu ayo ariyo yose? Imana ntiduhatira umukiro nk’inka bajyana mu rupangu ngo bazitere umuti. Ishaka ko iteka tugira uruhare mu kwakira umukiro yatugeneye muri Kristu Nyagasani. Iyo tubigenje dutyo, ineza yayo isesekara muri twe kandi ikagera no mu bayo bose. Icyo gihe ibiragi biravuga, abacumbagira bakagenda, ibipfamatwi bikumva… Nonese tutagiye kure, si abagiye bakira ingabire y’Imana badufashije natwe kuyimenya! Imiryango imwe n’imwe ifite ingabire zihariye zo kwita ku bamugaye, nayo nuko yavutse. Ibyo abafurere ba mutagatifu Gaburiheli bakora, abizeramariya, abamisiyonari b’urukundo ba Tereza w’i Karikuta, n’abandi batabarika bigaragaza ko Imana twemera yigaragariza abayishakashaka bose kandi ko mu mpera zose z’isi hatazabura abasingiza izina ryayo.
Twoye kumera nka wa wundi waciye mu murima w’undi, wamwihaniza ati erega mirenge ni wowe ubwirwa. Ahubwo twakirane igishyika ijambo rya Nyagasani maze dukomere mu kwemera bityo natwe tubone uko dukomeza abandi.
«Hahirwa utazagusha n’ibyo nkora».
Ushoborabyose nabahe umugisha mi izina ry’Imana Data na Mwana na Roho Mutagatifu, amina.