ICYUMWERU CYA 28 MU BYUMWERU BISANZWE BY’UMWAKA C

ICYUMWERU CYA 28 MU BYUMWERU BISANZWE BY’UMWAKA C
10/10/2004
2Bami 5,14-17
2Tm 2,8-13
Lk 17,11-19

Ijambo ry’Imana tuzirikana kuri icyi cyumweru riratwigisha gushimira. Yezu arahera ku mubembe wari ugaruwe no gushimira Imana, maze akatwigisha agaciro nyako k’ubuzima. Inkuru y’ababembe icumi batakiye Yezu ngo abakize maze akabategeka kujya kwiyereka abasaseredoti bakuru (kuko aribo bari bashinzwe umurimo we kwemeza ko umuntu yakize ibibembe kandi ko ashobora kongera gusubira mu bandi no mubuzima busanzwe), turayizi kandi iranumvikana rwose. Iri mu mavanjiri atworohera kuyasobanura kimwe n’iya Zakewusi, ka kagabo kagufi kabuze uko kabona Yezu kakurira igiti, iy’abayahudi bashakaga kugira Yezu umwami kuko yari amaze kubahaza imigati bati twasiga uyu tugasanga nde? Iy’ayandi mavanjiri bitworohera kuyaganisha mu rwenya ngo hato ukuri kwayo kutatubuza uburyo. Biroroshye kuvunga ngo ariko koko abandi icyenda kuki batagarutse gushimira. Wenda kuko bari abayahudi bazi amategeko baba baribwiye ko kujya kwiyereka abasaseridoti aribyo bikwiye cyane ko ari ko amategeko yabisabaga. Kandi ni mugihe, uwagarutse yari umusamaritani utari azi iby’Imana. No mu isomo rya mbere iwakize ibibembe ni umnyasiriya wari warabwiwe ko hari umuhanuzi ukiza maze akabyemera. Pawulo mutagatifu niwe wasobanuye bihagije ko agakiza tutagahabwa no gukurikiza amategeko, ahubwo tugakomora mu kwemera Yezu wadukijije. Ni nabyo Pawulo mutagatifu yabwira Timotewo mu isomo rya kabiri ati jya wibuka Kristu wabambwe mu bapfuye. Ku cyumweru gishize twazirikanaga ko niyo twakora ibyo dusabwa byose twaba turi abangaragu b’imburamumaro. Gushimira rero ni ngomba ndetse ni umuco kuko ngo nyamwanga iyo byavuye yanze uwamuhaye inka. Si ugushimira ariko byo ku rurimi, ahubwo kuhindukira kuriya musamaritani kwanashushanya guhindura icyerekezo. Nawe se uwari umukuye mu kato k’ibibembe kuki atari kumushimira? Rimwe mu masengesho makuru y’ukarisitiya (préface) riravuga ngo ibisingizo byacu ntacyo byongera ku buhangane bwawe, ahubwo nitwe byungukira ingabire zidukiza. Uriya musamaritani yakize ibibembe kandi atahana n’ukwemera kuko yamenye gushima. Sitwe tubuze ibyo twashimira Imana kandi n’uburyo burahari: igitambo cya missa cyangwa ukarisitiya bisobarura gushimira (action de grâce). Isengesho ryacu rero kuri icyi cyumweru ribe koko iryo gushimira Imana tutanibagiwe na none gukomeza kuyereka ubumuga n’ibibembe byacu. Reka nsozeshe ijambo rya Pawulo mutagatifu yabwiye Timotewo riri mu isomo rya kabiri: nidupfana na Yezu, tuzabaho hamwe na We; nituba intwari hamwe na We, tuzima ingoma hamwe na We; nitumwihakana, na We azatwihakana; nituramuka tubaye abahemu, We azaguma kuba indahemuka kuko adashobora kwivuguruza.
Imana ibahe umugisha.