ICYUMWERU CYA KANE MU BYUMWERU BISANZWE 2010C

ICYUMWERU CYA KANE MU BYUMWERU BISANZWE

31 mutarama 2010 umwaka C

 

Yer 1,4-5.17-19

1 Kor 12,31-13,13

Lk 4,21-30

"Medico, cura te ipsum". Ng'uwo umugani Yezu yibukije bene wabo b'i Nazareti, ubwo bari batangiye gukemanga ubuhangange bwe bitwaje ko bamuzi. Yezu ntagendera kuri rya jambo ngo indakuzi ntituma umugabo yivuga, ahubwo arahamagarira abayahudi kurenga izo mbogamizi, bakemera ko ari we muhanuzi uje gutangaza umwaka w'impuhwe za Nyagasani. Nibyo Uhoraho yari yarasabye umuhanuzi Yeremiya, ubwo yamuhamagara ati: ntarakuremera mu nda ya nyoko nari nkuzi. Genda ubwire umuryango wanjye ijambo nzagutuma kandi uramenye ntuzagire ubwoba imbere yabo. Mbere ye, umuhanuzi Eliya yari yarigeze kumena arahunga kuko bashakaga kumwica. Umumalayika ubwo yamuhaga icyo kurya yaramubwiye ati: kanguka urye kandi unywe kuko urugendo ni rwose. Ngira ngo turibuka indirimbo ijya iririmbwa mu missa ngo nari nicaye nshonje... Kwemera Imana ni ukigerezaho kuko ntawe ukina abandwa. Uwemeye Imana ntaba ikigira ngo ese abandi barambona bate cyangwa barantekerezaho iki. aba yarameshe kamwe, akemera Imana n'amategeko yayo ndetse akemera no kuyibera umugabo. Yezu yabiduhayemo urugero kugeza ku rupfu rwo ku musaraba. Ntibivuga ko abemera bose bazapfa rumwe na Yezu (ariko ryaba ari ishema rikomeye ryo kunywera ku nkongoro imwe na Yezu kuko Petero yarabihakanye ati: sinabambwa nka Databuja, bituma bamubamba igicuri), ariko imibereho yacu igomba kugerageza kwishushanya n'iye, tukayingayinga igihagararo cye mu butungane. Ibi bireba buri wese wakiriye ivanjiri kandi wiyemeje kubera Kristu umugabo mu bantu. Hari ariko n'ubundi buryo tugomba kwakira iri jambo rya Kristu: kwirinda kuba intambamyi ku bandi mu nzira yo kwegera Imana. Ibyo biba iyo twikanze ubutagatifu, maze abandi tukabashyira mu gatebo k'abanyabyaha kugeza n'aho twavuga ngo ntibakwiye no kwinjira mu kiriziya, guhazwa ho tuba twarabafungiye amasakaramentu kera. Iryo jisho rijora abandi, rigosora abandi rishakisha inkumbi, Yezu araryiyama ati: ntukarebe agatosti kari mu jisho rya mugenzi wawe ngo usimbuke umugogo uri mu ryawe. Ibyi byuzuzwa n'ijambo rya Pawulo mutagatifu, aho ashimangira ko urukundo ruruta byose. Nirwo munzani w'ubutagatifu. Ngo n'aho natanga ubuzima bwanjye n'ibyo ntunze byose, hatarimo urukundo, naba ndi bure. Ngo niyo nagira ubumenyi buhanitse gute, hatarimo urukundo, naba ndi nk'idebe. Urukundo ni byose kuko ni umutima w'Imana. Urukundo rurihanga, wowe se? Rwemera byose, wowe se? Rurababarira, wowe se? Ntirugira inzika, wowe se? Urukundo ntirwirarira, wowe se? Ndumva ntakomeza kugira uwo mpata ibibazo, ariko inyigisho y'iki cyumweru irumvikana: urugero rwo kwemera no gukorera Imana ni Kristu we utita ku magambo ya rubanda ahubwo akigisha ukuri kw'Imana ngo abazemera bazaronke agakiza. Abamwemeye tugomba natwe kwihatira gusa nawe, tukarenga inzitizi zose zatubuza gutangaza ineza y'Imana kandi byose tukabikorana urukundo kuko ukunda aba yaramenye Imana. Naho udakunda uwo we ake karashobotse.

 

ICYUMWERU CYA GATATU MU BYUMWERU BISANZWE 2010C

ICYUMWERU CYA GATATU MU BYUMWERU BISANZWE

24 mutarama 2010 umwaka C

Neh 8,2-4.5-6.8-10

1Kor 12,12-31

Lk 1,1-4; 4,14-21

Inkuru nziza y'iki cyumweru iragaruka ku gaciro k'Ijambo ry'Imana. Isomo rya mbere riratwibutsa uko umuryango wa Isiraheli wasomewe amagambo yo mu gitabo gitagatifu nyuma y'aho utahukiye uvuye mu bunyago. Bari bameze nk'ababonekewe kuko hari haciye igihe batumva ijambo ry'Imana dore ko ngo byabaye ngombwa kubasobanurira ngo bumve igisobanuro cy'ibyo basomerwaga. Wabaye umunsi w'agatangaza kuko abayisiraheli bongeye kumva Imana ibavugisha. Wenda bo buvanga batabikwiye kuko ngo bose baturitse bakarira. Nyamara Nehemiya yarababwiye ati: uyu ni umunsi ukomeye kuko ibyishimo by'Uhoraho nizo mbaraga z'umuryango we. Kuba Isiraheli yarongeye guterana igatega amatwi ijambo ry'Uhoraho cyabaye igitangaza gikomeye. Nibyo Yezu avuga mu ivanjiri ya Luka nyuma yo gusoma amagambo ya Izayi, ati: ibi mumaze kumva byujurijwe mu maso yanyu. Twibukiranye ko Luka atangira ivanjiri ye abwira Tewofili yayandikiye ati: nafashe akanya ko gusiganuza ngo nandike koko inkuru nyayo. Yezu rero niwe wuzuza amagambo y'ubuhanuzi, kumwumva ni igitangaza gikomeye. Niwe kandi wivugira ko amagambo yose Imana yasezeranije umuryango wayo yuzurizwa muri we. Abarwayi barakizwa, impumyi zirabona, ibipfamatwi birumva, ibumuga birakimbagira, ngo ni umwaka w'impuhwe za Nyagasani. Hari uwasoma Bibiliya akibaza niba koko ibyo asoma byarabaye cyangwa niba ari inkuru mu zindi. Hari n'uwakwifuza ko Bibiliya isigaramo gusa imirongo itamubangamira cyangwa se ihuje n'uko ahumeka. Yaba ababaye akaba yatombora gusa imirongo imuhoza; yaba yishimye agasoma aho bishima. Bibiliya ikamurinda cyane cyane hamwe hatera umuntu kwibaza icyo ari cyo n'icyo yaba yarakoresheje ingabire yahawe. Gusoma Bibiliya ni ukuganira n'Imana kandi kandi nta gitangaza kiruta iki. Reka ariko ngaruke no ku magambo ya Pawulo Mutagatifu mu rwandiko yoherereje abanyakorinti. Ati umubiri ni umwe ariko ugizwe n'ingingo nyinshi zose zuzuzanya ngo umubiri ugubwe neza. Nk'uko Imana itora abayo ikabashinga imirimo itandikanye ngo bubake umuryango wayo. Bose se baba abahanuzi? Bose baba abigisha? Bose se bakiza amashitani? Nta gahimano, buri wese akaberaho abandi ngo ineza y'Imana ikwire hose. Erega ibi byarinda kwigaragambya ngo nk'uko byigeze kugendekera ingingo z'umubiri. Umusatsi ntiwitaze ibibazo ngo n'ubundi iyo batawogoshe ugenda ukuramo akarenge. Umunwa ntube gusa zana mire cyangwa ngo utererane ibirenge ngo ni wowe ubwirwa. Inzara ntizibuze indi myanya amahwemo ziyikwatagura. Ubwo iyo umwuka wabaye mubi igikuba kiba cyacitse. Si uko se abantu bahindukana umwe yitsitsa ko akomeye, undi ko yize, undi ko yabonekewe maze igikuba kigacika. Habe se hari ukibuka ko izo ngabire ari impano! Ashwi da. Ngo iyo ntahaba ntacyo mwari kwimarira. Yezu ati: ibyo mwumva byujurijwe mu maso yanyu uyu munsi. Hahirwa abanyurwa n'Ijambo ry'Uwiteka kandi bakarironkeramo agakiza. Aba nibo batuma Imana yuzuza amasezerano yayo maze buri wese akabona agakiza kayikomokaho.

 

 

ICYUMWERU CYA 2 MU BYUMWERU BISANZWE 2010C

ICYUMWERU CYA 2 MU BYUMWERU BISANZWE

17 mutarama 2010 umwaka C

 

 

Iz 62,1-5

1 Kor 12,4-11

Yh 2,1-12

Ivanjiri y'iki cyumweru itubwira inkuru y'ikimenyetso cya mbere Yezu yakoze ahindura amazi divayi mu bukwe bw'i Kana. Iyi vanjiri bakunze kuyishingiraho berekana ko Yezu yatangiye ubutumwa bwe atagatifuza abashakanye nk'uko Imana irema muntu yabaremye ari umugabo n'umugore. Ibi kandi bishimangirwa n'amagambo yo mu isomo rya mbere, aho umuhanuzi Izayi yibutsa ko Imana ikunda umuryango wayo nk'uko umugabo akunda umugore we. Ndetse ikitegererezo cy'urukundo rw'abashakanye gishingira ku rukundo Kristu akunda Kiriziya. Ibi birumvikana. Ivanjiri ariko y'uyu munsi ntivuga gusa ku rukundo rw'abashakanye, ahubwo yibanda ku ngorane ishobora kuvuka iyo divayi ishize. Iyo abashakanye batabashije gukemeza guha urugo rwabo kimwe n'abarugana divayi y'umunezero waabo. Yezu yari yatumiwe nk'abandi, ariko turabizi si umushyitsi usanzwe kandi na Mariya si umubyeyi usanzwe kuko bombi bafite umutima wuje ubuntu n'ineza. Yezu we birumvika ni Imana kandi ni cyo cyamuzanye: kugaragaza urukundo rw'Imana. Tugarutse kuri iyi vanjiri, imbarutso yabaye divayi yashize. Wenda ntako bari bimereye cyangwa umunyabintu yari yabyitwayemo nabi. Sinibwira ko Mariya ariwe wabibonye bwa mbere, birashoboka ko inkuru yari yabaye kimomo ko ubukwe bugiye kurangira nabi. Ibya wa mugani, Imana igira itya irahagoboka. Si ngombwa gusubira mu nkuru, gusa twareba icyo iyi vanjiri yatwungura. Yezu yatumiwe mu bukwe ariko dushobora no kumutumira mu zindi manza. Si nawe gusa kandi dutumira, duhora dusabana n'abandi haba mu byiza cynagwa mu byago. Ikindi Yezu yasize araze abe ubutumwa bwo gukwiza hose inkuru y'ineza n'amahoro. Uyu munsi nitwe dutumirwa tukagomba kubera abandi Yezu na Mariya. Ibi bivuga ko nta ndorerezi cyangwa abashukamirizi bagombye kubaho mu buzima. Uwakiriye ukwemera akishushanya na Kristu muri batisimu aba yahindutse Kristu, bityo agasabwa kuhoza ijisho ku buzima bwe n'ubwa mugenzi we. Kumenya ko urugo rw'abageni rutagifite divayi no kwibuka kubibwira Yezu ni inshingano ikomeye abakristu bagomba kugira. Ikigezweho ubu ni uko iyo akabazo kavutse haba mu bashakanya cyangwa n'ahandi, tubimenyera mu binyamakuru. Ubwo ga bikaba inkuru mu zindi maze uri mu kaga akaba ayatayemo. Pawulo mutagatifu aratwibutsa mu ibarowa yandikiye abanyakorinti ko Roho utanga ingabire ari umwe ariko akazigena uko yishakiye kubera akamaro k'umuryango wose ari wo Kiriziya. Muri izo ngabire harimo n'iyo gusabira abandi no gutura Imana ingorane zabo. Kuri icyi cyumweru twibuke abantu bose bahora badusaba kubasabira, tukikiriza bwangu ariko wenda bigacira aho. Tubasabire guhorana divayi, ni ukuvuga akanyamuneza k'ubukwe. Natwe ariko ntitwiyibagirwe kuko wenda wasanga dusigaye turi ibikatsi, Yezu atwongerere ubuntu. Igikomeye ariko ni ijambo rya Maryia yabwiye abahereza ngo: icyo abategeka cyose mu gikore. Roho Mutagatifu aduhe imbaraga zo kumva iryo jwi rya Bikira Mariya kandi no guhora twibutsa bose ko ara nta handi hari umukiro atari muri Yezu: icyo adutegeka cyose tuge tugikora.

 

UMUNSI MUKURU W’UKWIGARAGAZA KWA NYAGASANI 2010C

UMUNSI MUKURU W'UKWIGARAGAZA KWA NYAGASANI

10 mutarama 2010 umwaka C

 

Iz 60,1-6

Ef 3,2-3a.5-6

Mt 2,1-12

Turahimbaza umunsi mukuru w'ukwigaragaza kwa Nyagsani, umunsi wa Epifaniya. Ni umunsi witirirwa uw'abami bagiye kuramya Yezu babitewe n'inyenyeri bari babonye. Ubanza bari bamaze igihe bitegereza ikirere cyangwa se hari icyo bari bategereje bityo inyenyeri ikaba yarababereye imbarutso. Ikigaragara ni uko bahise bagenda batazuyaje kandi bagahitira ibwami kubaza inkuru y'imvaho ngo hato bitaba gusa gushiturwa n'inyenyeri. Sinirirwa ngaruka ukuntu abavugwa muri iyi vanjiri bitwaye, ndavuga Herode, wanga kwakira inkuru y'agakiza, agahitamo gucura imigambi mibisha ajijisha ngo nawe akeneye kuramya Yezu naho ari impuhwe nk'iza bihehe. Abasaserdoti baryoherwa no kurangira abandi aho umukiza yavukiye ariko bo bakigumira mu ngoro, ntibirushye bajya kuramya Yezu. Aba bo Yezu azakomeza kubanenga abwira abamwumvaga ati: mujye mwumva ibyo bavuga ariko ntimukabigane kuko bavuga ariko ntibakore. Twanavuga bariya bami baturutse iyo bigwa babonye inyenyeri bakajya kuramya uruhinja Yezu. Aba bo batubera urugero kuko isengesho nyaryo dukwiye kuvuga ni ukuramya Yezu kubera ineza yatugiriye kandi adahwema kutugaragariza. Reka ariko mbatege igitego: ko nshimye bariya bami bakurikiye inyenyeri, aho muri iki gihe cyacu haracyari ibimenyetso bitwibutsa kugana Imana? Inyenyeri dukurikira ni iyihe? Inyenyeri zireze mbe ariko navuga: abashidukira uburanga, ubukungu, ubwenge, ibyamamare, n'izindi mpamvu ntarondora zisa n'izidutwara uruhu n'uruhande. Ariko se izo nyenyeri koko ziramurika cyangwa ni icyuka? Uziringira aho agera kure cyangwa ni akanya k'ubusabusa zikaba zirazimye burundu. Inyenyeri y'Imana iriranga kuko itumburuka hejuru igasumba izindi kandi ikanaba nto byo gutuma ibonwa n'ucishamake. Iyo ni inyenyeri y'ubuntu n'urukundo, inyenyeri y'ubutabera n'amahoro, inyenyeri n'ubugwaneza n'ubusabane. Izi nyenyeri zisumba isi kuko zigera mu bushorishori bw'ijuru, aho Imana iganje. Nyamara ni na nto kubi kuko ziturira mu mutima w'abiyoroshya. Ng'izo imuri zizaturangira aho Yezu yavukiye. Kwa Herodi, izi muri zirazimira kuko hahora habuditse umwijima w'inabi. Nyamara uhasohotse arongera akazibona. Uyaba buri wese yazibonaga, yamenyaga inyenyeri imuyobora kandi akayikurikira atazuyaza. Birumvikana ko kubona inyenyeri no kuyikurikira ubu tubisanga mu ijambo ry'Imana kuko Nyagasani adahwema kutuyobora akoresheje ijambo rye. Tunazisanga mu nyigisho zinyuranye za Kiriziya, amasakaramentu duhabwa, impanuro n'inama duhabwa n'abavandimwe n'inshuti, ndetse n'ubundi buryo bwose Imana yahitao ngo itumurikire. Ubwo natwe kandi tukaba dusabwa guhaguruka tutajuyaje ngo tujye kuramya Umucunguzi. Tuzi ko Kiriziyiya idushishikariza kuyiramya kensho mu Isakaramentu ry'ubuntu bwayo ari ryo ry'Ukaristiya. Tutanibagiwe kuyirangamira ku giti cy'umusaraba aho twarongeye iyo neza idakama. Sinasoza ntibukije ko umunsi wa Epifaniya ukurikirwa n'uwa batisimu ya Nyagasani, ubundi Noheli tukaba tuyiherekeje cyangwa se dukungitse iminsi mikuru, tukinjira mu byumeru bisanzwe by'umwaka. Batisimu ya Nyagasani nayo yinjira mu minsi ya Noheli kuko Yezu yigaragariza abari bategereje Umukiza mu gihe Yohani yamubatizaga. Ibyo kandi bikatwibutsa ko natwe duhinduka nka we, tukaba abana b'Imana n'intumwa z'ubuzima bushya muri batisimu twahawe. Imana nihabwe ikuzo ubu n'iteka ryose. Amina

 

 

 

 

ICYUMWERU CYA KABIRI NYUMA YA NOHELI 2010C

ICYUMWERU CYA KABIRI NYUMA YA NOHELI

03 mutarama 2010 umwaka B

 

Sir 24,1-4.12-16

Ef 1,3-6.15-18

Yh 1,1-18

Umunsi umwe umunovisi yegereye umumonaki w'umusaza wari watwawe imbere y'Ubushyinguro butagatifu, aramubaza ati: wambwira uko uba wumva umeze imbere y'Isakaramentu ritagatifu. Umusaza yaramusubije ati: ahubwo gerageza kumva uko Imana iba imeze cyangwa ikureba aho yibereye mu Bushyinguro butagatifu. Akenshi iyo tuvuga cyangwa dusobanura amahame y'ukwemera, uburyo tuzi Imana kandi tugerageza kuyikunda, dukunze kubikora duhereye ku ruhande rwacu, uko tubyumva, uko tubibona, ukwo byagombye kugeda,.... Ntabwo tuba twibeshye ariko biba bidahagije. Umunsi wa Noheli cyane cyane ivanjiri ya Yohani twasomewe ku munsi wa Noheli none Kiriziya ikaba yongeye kuduha uburyo bwo kuyizirikana nibyo idusobanurira. Kwigira umuntu kwa Kristu ni ineza y'Imana ishaka kudusangiza ku rukundo rwayo ngo twoye guhera mu icuraburindi ry'umwijima n'icyaha ahubwo tubeho mu kuri n'urukundo byayo. Jambo wahozeho iteka ryose, uwo byose bikesha kubaho yemeye kubaka inzu iwacu. Bibiliya ikoresha ijambo ihema kuko ari bwo buryo bwariho bwo kubaka amazu, ariko ubwo buryo budufasha no kumva ko Imana yubaka ihema iri rishobora kwimukanywa bitewe n'uko bene ryo bimutse. Imana rero ituye aho muntu atuye, ikaba yimura ihema bitewe n'urukundo idukunda. Ngo yaje mu bayo ariko abayo ntibayakira. Aka ni akaga kumva Imana ibura umwanya iwayo kandi koko niko byagenze kuko Yezu yavukiye mu kiraro cy'amatungo. Muri Kiriziya y'aba Ortodosi, hari abashushanya ikirugu nk'imva. Wenda twakumva ari ugukabya ariko ni kimwe: Yezu yaje mu be bamwima icumbi avukira mu rwango aka ya mazina y'amagenurano ngo Mbamubanzi. Ibi kandi bizageza ku ndunduro ubwo azemera byose agaheka umusaraba kubera ibyaha byacu. Ijambo ryiza ariko nuko abamwemeye yabahaye ububasha bwo kwitwa abana b'Imana, bakaba bavuka ku bwa Roho Mutagatifu. Ese aho twibuka guhuza iri jambo n'indamutso ya Malayika kwa Mariya. Uzasama ku bwa Roho Mutagatifu. Ubwo ga natwe muri Kristu nk'uko Mariya yasamye natwe niko tuvuka tukaba abana b'Imana. Ibi rero bintera imbaraga n'ishema, atari uko ndi icyatwa cyangwa icyamamare, ahubwo kuko ndi umwana w'Imana. Binantera ipfunwe kuko uko nitwara ntibuhuye na mba n'izina Imana yampaye muri Kristu Umwana wayo ariko ndabigendera. Niba se Imana yarabishatse gutyo kuki jyewe ntaryoherwa no kumva inkunze. Ibi kandi nibyo Pawulo intumwa aririmba mu ibarowa yandikiye abanyefezi ati: nihasingizwe Imana Data Se w'Umwami wacu Yezu Kristu kuko yadusendereje ibigisha yo mu ijuru muri Kristu, kuko yaduhisemo isi itararemwa ikatugura abana bayo. Ibindi byose twakwifuza cyangwa twararikira nta gaciro bigira niba tubirutisha urukundo Imana yadukunze kandi ikidukunda muri Kristu Umwana wayo. Ahubwo kubakira kuri iyi neza nibyo byonyine biha agaciro ubuzima bwacu n'imirimo Imana iduha gutunganya hano ku isi. Tureke rero urukundo rw'Imana rusagambe muri twe, tureke Kristu ature rwa gati muri twe maze ineza ye itumurikire.