ICYUMWERU CYA 13 MU BYUMWERU BISANZWE 2009 B

ICYUMWERU CYA 13 MU BYUMWERU BISANZWE

28 kamena 2009 umwaka B

 

 

Buh 1,13-15;2,23-24

2 Kor 8,7.9.13-15

Mk 5,21-43

"Talità kum. Mukobwa ndabikubwiye: haguruka". Inkuru ziza y'iki cyumweru irashimangira ko Imana ari isoko y'ubuzima kandi ko abayemera bazagira ubuzima bwuzuye. Igitabo cy'Ubuhanga kitwibutsa ko Imana itaremye urupfu, ko ibyaremwe byose bigenerwa gutanga ubuzima, nta burozi bw'urupfu bubirangwamo, n'ububasha bw'ikuzimu ntibutegeka isi kuko ubutabera budashobora gupfa. Aya magambo arakomeye kandi akwiye kwiringirwa. Ikibazo cy'urupfu n'ububabare bujyana na rwo ni ingingo ikomeye yamye ivugisha menshi abahanga b'amoko yose. Abibaza aho urupfu rwavuye, abakeka ko wenda haba ibinyabubasha bibiri nka kwa kwemera kw'abasokuruza bacu bemera Rurema isumbabyose na ruremankwashi, abakeka ko Imana itwigizaho nkana iduhana kubera amakosa yacu maze ikatugabiza urupfu, abahagama ku rwandiko ikibaye cyose bakagitwerera Imana, n'ibindi ntarondora. Igitabo cy'Ubuhanga gikomeza kitwibutsa ko urupfu rwakuruwe n'ishyari rya sekibi maze rwigarurira abamuyoboka. Itsinzi y'urupfu si ukubyara nk'uko abakurambere bacu babyibwiraga ko indagu y'urupfu ari ukubyara. Itsinzi y'urupfu ni ubutabera bwagaragariye muri Yezu mu rupfu rwe n'izuka rye. Ni byo Yezu yagiye yereka abigishwa be. Ivanjiri ya Mariko iratwereka Yezu akiza umugore wari warakoronijwe n'indwara imyaka na yindi akaza kwihara kubera ukwemera agakora ku gishura cya Yezu yizera ko ari bukire. Ubuhanga bw'Imana ni uko nta kiyicika n'iyo haba mu ruvunge. Akenshi ndetse biratungurana kumva kiriya kibazo cya Yezu ngo ninde ukonzeho. Ese burya tujya twibaza ko iyo twegera amaze matagatifu, rimwe na rimwe mu mirongo idasobanutse, dushobora kuhakirira, bambe tuhakirira? Tuzabe se nka wa mutwa wabonye abatambagizaga isakaramentu ritagatifu, akibwira ko baniganira ikintu gikomeye. Akavunda, akavunda yagera ku kitabasha akiyamira ati: ni Kashyengo!! (Kashyengo yari umupadiri wa Nyundo, watambagizaga isakaramentu muri iyi nkuru y'uyu mutwa). Uriya mutwa yatahiye aho ndetse ashobora no kuba yaratashye ababaye ko nta cyo aronse. Nyamara uriya mugore wo mu ivanjiri yarakize. Undi Yezu akiza ni umwana wa Yayiro wari wapfuye maze yezu akamutegeka kwongera kubaho. Inkuru nziza ya none iraduhamagarira kubaho kuko Yezu ari isoko y'ubuzima. Ubumuga bwacu bwose tubwereke Yezu ni we muganga utagira ikimusoba. Natwe ariko tuhamagariwe gutanga ubuzima, tugaca ukubiri na sekibi we soko y'urupfu. Pawulo mutagatifu aradufasha kubyumva kuko aduha urugero rwo gutabarana. Ati: simbasaba kwikokora, ariko icy'akarusho mutunze, kizatabarure abari mu bwinazi maze icyo nabo bazabarusha kizabatabare mu bukene banyu kuko ngo awayoye byinshi nta cyo yarengejeho n'uwayoye bike nta cyo yabuzeho. Twebwe ubanza atari uko tubyumva. Dushobora kuba nk'abigishwa batangazwa no kumva Yezu abaza umukozeho cyangwa nka bariya batumvise imvugo ya Yezu wemezaga ko uriya mukobwa wa Yayiro atari yapfuye ahubwo yari asinziriye. Uko biri kose, Kristu niwe Gakiza kacu, tumugane tumwiringiye, tumwiroheho nta cyo tumukinze kuko azadukiza, detse ahubwo yaradukijije. None se ntituririmba ngo yaradutoye aduha ibidutunga kandi atugira abatoni. Twamuburana iki se niba tumwemera koko. Naharirwe ibisingizo bimurata ubu n'iteka ryose, amina.

ICYUMWERU CYA 12 MU BYUMWWRU BISANZWE 2009 B

ICYUMWERU CYA 12 MU BYUMWWRU BISANZWE

21 kamena 2009 umwaka B

 

 

Yobu 38,1.8-11

2 Kor 5,14-17

Mk 4,35-41

"Mwigisha, nta cyo bigutwaye ko tugiye gushira?" Aya ni amagambo intumwa zabwiye Yezu ubwo ubwato bwendaga kurohama kubera umuhengeri. Amasomo y'iki cyumweru aradufasha kuzirikana ku ngingo ikomeye y'agaciro ku kwemera mu mage duhura nayo mu buzima. Isomo ryo mu gitabo cya Yobu riratwibutsa amateka y'ubuzima bwa Yobu wakoraniweho n'amakuba y'amoko yose kugeza aho bagenzi be bibazana niba atari igihano Imana yari yamuhaye kubera ibyaha bye kabone ni ubwo we yakomezaga kwemeza ko ari umwere ndetse akanasaba ko Imana yaza bakiburanira. Agace k'isomo rya none ni igisubizo Imana yahaye Yobu imusobanurira ko ububasha bwayo butagomba gukemangwa. Imana iti: harya ndema ibiriho byose ni wowe wangiraga inama? Yaba se ari wowe wagennye imbago z'inyanja. Birumvikana ko Imana itari igambiriye kwiyemera kuri Yobu, ahubwo ni uburyo bwo gusobanura ko inzira z'Imana zirenze ibyo umutwe wacu wageragaza gusobanura. Bihura n'amagambo Pawulo mutagatifu yatwibukije ko Kristu yapfuye kubera twe, bityo tukaba turiho tubikesha we wadukunze. Nta na kimwe rero cyadutanya n'Imana nk'uko nta nicyo yatwima niba yaremeye kudupfira ku bwende bwa yo. Gusa ariko twahinira gato ku magambo y'ivanjiri. Abayahudi bibwiraga ko amashitani n'ibindi binyabubasha byaba bitura mu nyanja. Bityo umuhengeri washoboraga guterwa n'umunyaga usanzwe nk'uko wanaterwa n'ibyo binyabubasha byabaga bituye mu nyanja. Twibuke ko igihe Yezu yirukanye roho mbi mu muntu zari zarakoronije zasabye Yezu ko yazireka zikigira mu ngurube, ayo matungo yahise yiroha mu nyanja, bisobanura mu ndiri yayo. Kuba rero Yezu yaracyashye inyanja n'umuyaga ni ikimenyetso gikomeye ko n'ibinyamaboko by'ikuzimu byumvira Yezu. Twibukiranye ko mbere gato Yezu yari yatubuye imigati akagaburira abantu batabarika; yari yakijije ikimuga ndetse akanagihanagura ho ibyaha, yari yakijije nyirabukwe wa Simoni Petero. Mu yandi magambo Yezu yagaragazaga ko ingoma y'Imana iri rwa gati mu muryago wayo. Ibi ariko ntibyabujije abigishwa gushya ubwoba babonye ubwato bwenda kurohama mu gihe Yezu yari yisinziriye. Si rimwe si kabiri, twibwira ko Imana isinziriye cyangwa se yatwimye amatwi mu gihe ubuzima bwacu busa n'ubwenda kurohama. Si rimwe si kabiri dusaza imigeri cyangwa dupfunda imitwe dutakira Imana ngo itwarure. Nyamara burya iba ihari kandi itureba kuko ntisinzira. Aka wa mugani w'umugabo warose ngo atemberana n'Imana ahantu h'umucanga ku nkombe z'inyanja. Ngo yabonaga ibicucu bibiri hanyuma aza kubona gusa igicucu kimwe ndetse ngo asubiye inyuma abona kamwe hari ibirenge by'umuntu umwe. Ngo yabajije Imana impamvu hari aho bari kumwe, hakaba n'ahandi yamutaye ikamutererana. Imana yamusubije ko aho yagiye abona igicucu kimwe cyangwa ibirenge by'umuntu umwe, ari yo yonyine yagaragaraga kuko ngo yari yarushye Imana iramuterura. Ng'uko uko bigenda iyo twahagijwe n'amage y'ubuzima tukibwira ko Imana yasinziriye cyangwa se yaduteye umugongo. Burya niyo yonyine iba idutwaye mu maboko cyane ko n'ibiba bitubaho biba birenze ubwenge bwacu. Yezu yacyashye abigishwa be ati: ese nta kwemera muragira? Natwe ubanza yabitubwira ariko twisabire ngo mu gihe tuba twugarijwe n'imiyaga n'imihengeri by'ubu ubuzima tujye twibuka ko Yezu ari harya mu nguni itagaragara ngo acubye uwo muhengeri. Kumutakira ntitwabireka ariko tujye tunagira ubutwari kuko duhagarikiwe n'Usumbabyose.

UMUNSI MUKURU W’ISAKARAMENTU RITAGATIFU 2009 B

UMUNSI MUKURU W'ISAKARAMENTU RITAGATIFU

14 kamena 2009 umwaka B

 

Iyimi 24,3-8

Hb 9,11-15

Mk 14,12-16.22-26

Turahimbaza umunsi mukuru w'Isakaramentu ritagatifu. Ni umunsi utwibutsa ineza n'urukundo Imana yadukunze ubwo yatwohererezaga Umwana wayo, akatwitangira maze akasuìigira isezerano ryishya rishingiye ku mubiri we n'amaraso ye. Atari isezera kera Uhoraho yari yaragiranye n'umuryango we rishingiye ku maraso y'ibitambo byaturwaga muri Hekaru. Ni isezerano rishingiye ku buntu gusa gusa. Ivanjiri ya Mariko iratwibutsa amagambo Yezu yavuze mu isangira rye rya nyuma n'abigishwa. Ati: uyu ni umubiri wanjye, iki ni amaraso yanjye. Mu yandi magambo, ati: uyu nijye wese Imana yanyu, ubushake bwanjye, ineza yanjye, imbabazi zanjye... Yego ntitugomba guhomerera boshye abatazi icyo tuba dukurikiye cyangwa uwo duhabwa, ariko tuba duhabwa umuti nya muti, ineza itagereranywa, ubuzima bwuzuye, urukundo nyarwo,... Aha rero hadutera imbaraga kandi hakaturinda kwikuza cyane cyane iyo twibeshyera ko tuzahabwa Yezu ariko uko twumva tubishatse cyangwa ngo umutima wacu ukeye. Simvuze ngo uko twaraye cyangwa uko tuba tuvuye mu nduruburi za buri munsi duhitire kuri Alitari nta na "ndishinja" (ndavuga kwicuza no kwitegura kwakira Yezu), ariko niba dushaka kumva akamaro k'umukiro Yezu yadusigiye, tugomba rwose kumwakira cyane cyane mu isakaramentu ry'Umubiri n'Amaraso bye. Muri iri sakaramentu, duhabwa byose. Icyiza kandi k'ingabire dukuramo, ni uko inzara n'inyota bishira, tukaruhuka, ndetse tugahinduka natwe isoko y'ineza, impuhwe, urukundo,... by'Imana. Muri make natwe tugahinduka Umugati utanga ubugingo. Igihe cyose ariko duhabwa Yezu dusa nk'aho hari ikindi aduca (ubutungane twikekaho, ibikorwa rukana twaba dukora, ubuhamya cyangwa ubutumwa twaba duhabwa n'ab'ijuru,...), tuba dupfobya ineza ye, tuba twiyima agakiza bityo tukaba twataha amara masa cyangwa tukamera nka ya ngata imennye. Biba bibi kurusha kandi iyo twihaye kuba amacamanza: ngo dore n'uriya aratinyutse agiye guhabwa Yezu koko nta soni. Wenda arazifite kuko nawe azi uko ateye. Ariko se niba abarwayi badasanze Muganga, hazakira nde? Uwo muganga se we akazi ke kazaba akahe? Kwitemberera no kwinyuza mu biro ngo asinyishe ko akora. Yezu ntiyikatishije cyangwa ngo yinyuze mu buzima bwacu byo kwiyerekana. Yaje aje kandi ngo umwanzi wanyuma azatsinda ni icyaha n'urupfu. Uyu munsi duhimbaza rero utebere ko umwanya wo kwishimira ineza Imana itugirira muri Kristu. Reka nsozereze ku magambo ya yandirimbo turirimba uyu munsi: Rata Siyoni. Wowe Mushumba nyamushumba, wowe Mugati nyawe Yezu, turagire uturwaneho uzadusohoze iwawe iwabo w'abazima. Amen Alleluya.

UMUNSI MUKURU W’UBUTATU BUTAGATIFU 2009 B

UMUNSI MUKURU W'UBUTATU BUTAGATIFU

07 kamena 2009 Umwaka B

 

Ivug 4,32-34.39-40

Rom 8,14-17

Mt 28,16-20

Turahimbaza umunsi w'Ubutatu Butagatifu: Imana Data, Imana Mwana, Imana Roho Mutagatifu. Ni umunsi ukurikira uwa Pantekositi kuko wenda uwabigenekereza mu myumvire yacu, Roho Mutagatifu twamuhishuriwe ku buryo bunoze umunsi amanukira ku ntumwa. Musa , mu gitabo cy'Ivugurura mategeko, yibukije umuryango wa Isiraheli ko Imana yigaragarije umuryango wayu nk'Imana y'urukundo. Musa ati: uzasiganuze ubaririze niba hari andi mateka avuga Imana yakunze abantu nk'uko Uhoraho yabigenje. Ukwemera kwacu gushingiye ku Mana yatwihishuriye muri Yezu Kristu, atari Imana tubwirwa n'ubwenge bwacu, ahubwo uko yo yabigennye. Imana ni urukundo mu butatu busangiye kamere. Imana ikunda Mwana mu rukundo rwa Roho Mutagatifu. Atari uguhanika mu mahame y'Ubutatu Butagatifu, dore ko atari n'ihurizo ryoroshye, abemera barangamira Imana kuko ari yo gakiza kacu. Imana yaremye byose ni yo yatoye umuryango wa Isiraheli ngo uzabe ihuriro ry'abemera muri Kiriziya ya Kristu. Ibitangaza dusoma muri Bibiliya ntibyarangiranye n'ibihe byashize ngo wenda Imana tube twayigereranya na ya migani cyangwa ibitekerezo byo hambere. N'ubu Imana ikomeza kwigaragaza ngo itubohore ku ngoyi ya sekibi. Ku buryo bunoze, twamenye Imana muri Kristu, we Shusho ry'Imana itagaraga, igihe atwitangiye ku musaraba agapfa mu kimbo cyacu maze akazukira kudukiza. Imana twemera ni Imana yitangira abayo; si Imana itunzwe n'ibitambo by'abantu. Kristu yenda gutanga yaduhaye Roho we wigaragaje ku buryo bunoze ku munsi wa pentekisiti ngo ayobore abemera mu nzira nyayo. Twebwe rero abahimbaza iyobera ry'Ubutatu Butagatifu, dufite amahirwe akomeye kuko tubeshejweho n'inema z'Imana idukunda bitagereranywa. Ngo twahawe Roho w'Imana utuma tuvga ngo Abba Dawe. Twibuke ko amwe mu magambo umwana aheraho yiga kuvuga ari Data. Natwe dutaguza duhamagara Data wo mu ijuru kuko turi abana be. Pawulo mutagatifu yabisobanuye neza mu ibarowa yandikiye abanyaroma. Ntibihagije ariko kwemera ko Imana ari imwe mu batatu basangiye kamere, kuko byaba nk'ubundi bumenyi twize mu ishuri. Ukwemera ni isoko y'ubuzima bushya muri Kristu. Uwemera agengwa na Roho bityo akera imbuto za Roho twazirikanaga ku cyumweru gishize. Uwemera ahinduka intumwa kuko ntidushobora kutamamaza ineza twaronkeye muri batisimu twahawe mu izina ry'Imana Data na Mwana na Roo Mutagatifu. Iri ni itegeko Kristu yasigiye abe mbere yo gusubira kwa Se. Wenda twese ntitwaba intumwa zishinzwe kujya kwigisha ivanjiri, ariko duhamagariwe guhamya ivanjiri twemeye mu buzima buhuye n'ibyo twatojwe. Intumwa nyayo ni ihesha ikuzo uwayitumye, ntinyuranye amagambo cyangwa ngo yiyitirire ubutumwa itahawe. Dusabe Imana kunyurwa n'ineza tuyikesha kandi no kabaho bihuje n'ubutorwe bwacu: abana b'Imana nzima Data, Mwana, Roho Mutagatifu. Amina.

UMUNSI MUKURU WA PENTEKOSITI 2009 B

UMUNSI MUKURU WA PENTEKOSITI

31gicurasi 2006 umwaka B

 

Intu 2,1-11

Gal 5,16-25

Yh 15,26-27; 16,12-15

Turahimbaza umunsi wa pentekositi, Roho Mutagatifu amanukira ku ntumwa. Igitabo cy'Ibyakozwe n'intumwa kitubwira ko igikubara cyacitse ubwo aho intumwa zari ziteraniye hamanukiye inkubi y'umuyaga imeze nk'indimi z'umuriro zigakwira ku bari aho bose maze bagatangira kuvuga mu ndimi. Ni imbaraga Kristu yari yarasezeranije abe mbere y'uko asubira mu ijuru ngo bazabashe kumubera abahamya ku isi. Uwo Roho niwe Pawulo mutagatifu avuga mu ibarowa yandikiye abanyagalati. Abamuhawe bakora ibikorwa bimuranga kuko barangwa n'ibyishimo, amahoro, kwihangana, ubugwaneza ubuntu n'indi migenzo myiza iranga umuntu wuzuye Roho Mutagatifu. Abatifitemo Roho Mutagatifu nabo bariranga cyangwa se barangwa n'ibyo bakora: ubusambanyi, ubuhabara, ubwomanzi, kwangana, gukurura intonganya n'izindi nduruburi ntarondora. Uwifitemo Roho Mutagatifu, cyangwa ugengwa na Roho avuga ururimi rushya kuko aba agengwa n'ineza n'urukundo; siwe uvuga cyangwa ukora ahubwo n'Imana imukoreramo, ikanamuvugiramo. Ng'urwo urugero rwatunguye abari bateraniye i Yeruzalemu kuko ngo buri wese yumvaga u rurimi rwe intumwa zitanganza ibitanganza by'Imana. Pentekositi ikunze kugereranywa n'igihe ngo abantu bashatse kubaka umunara wabageza ku Mana, bakageza aho batari bacyumvika, bakabishwaniramo. Intumwa zo zari zifungiranye kubera gutinya abayahudi, maze Roho azimara ubwoba zirasohoka zitangira kwigisha. Erega no muri iki gihe cyacu twavuga ko Roho Mutagatifu agikora ibitangaza, abantu b'intamenyekana bagasohoka bakajya ahabona maze bagahesha Imana ikuzo mu bikorwa byabo akenshi na kenshi biba bitanahagije ariko byuzuye ineza n'urukundo mu gihe abashaka kubaka iminara igera mu bicu baba batangiye kutumvikana kubera ko buri wese aba ashihanira ikuzo rye. Dore ingero nk'ebyiri: ubu haravugwa ikoranabuhanga rigezweho rya internet na telefoni zigendanwa. Ni ubuhanga butangaje kuko intumanaho ryarakataje byo gutuma aho umuntu ari hose yasabana n'uwo ashaka kandi mu gihe kibangutse; isi ngo yahindutse umudugudu cyangwa inzu y'igitangangurirwa iharaze ubudodo buyihuza yose. Nyamara kumvikana byabaye ihurizo: ngabo abumviriza abandi, abaneka, abicuruza cyangwa bacuruza abana, abanyanganya abandi n'andi mafuti ubu yabonye urwaho mu itumanaho ry'ubu. Simvuze ko technique y'iwacu yo guhamagara uwo ukeneye mu mpinga y'umusozi ariyo twahitamo, aka ya nkuru ya wa mwana wo mu Rukiga wahamagaraga nyina amuregera murumuna we. Ariko iterambere ntirihagije ngo tugere kubusabane n'ubwumvikane nyabwo. Urugero rwa kabiri n'amakimbirane ubu avugwa hagati ya Irani n'Amerika, amakimbirane ashingiye ku twaro za kirimbuzi. Bamwe baratinya ko ibyo bavumbuye n'abandi babigeraho maze bakazaba batagishoboye kubacecekesha. Simpamya ko Amerika ishishikajwe n'umutekano w'abatuye isi kurusha inyungu z'ubukungu ikurikiye mu bihugu by'abarabu. Nyamara ngo irashaka gukumira uwazashaka kworeke isi. Umunsi wa Pentekositi rero turawukeneye ngo twiyibutse ibitangaza Imana yakoreye abayo ubwo yabahaga imbaraga zo kumenyekanisha ineza y'ubuntu byayo. Isi yacu ikeneye kugengwa n'Umwuka mushya atari gusa uyu uvugwa n'abaharanira ibidukikije, ahubwo umwuka wuzuye ingabire z'Imana. Pawulo Mutagatifu, mu ibarowa yandikiye abanyaroma, ibarowa isomwa mu gitaramo cya pentekositi, avuga ko isi yose inihishwa n'imibabaro nk'umugore wenda kubyara kuko itegereje icugurwa ryuzuye muri Kristu. Ububabare uho buva bukagera ntibugira ibisobanuro uretse kuvuga ngo agahwa kari ku wundi karahandurika. Nyamara ngo ububabare bw'umugore uri ku bise ni bwo bwonyine bufite igisobanuro kuko aba yiteze ibyishimo birenze, bituma yibagirwa ako kanya imibabaro yari afite kugeza n'ubwo yiyemeza kongera kubyara. Ng'uko uko ugengwa na Roho agomba kubaho: guhangayikishwa no gutanga ubuzima kugeza aho kwemera n'ibyaturushya tubizi neza nk'umugore wenda kubyara. Utagengwa na Roho ubanza iyi mvugo yayita iy'abasazi kandi ni mu gihe kuko ngo imvugo ya Roho, kimwe n'iy'umusaraba ni ubusazi ku bishingikiriza ubwenge bwabo, nyamara ku bemera ni ubuhanga burenze imivugirwe.

Imana iragahora isingizwa iteka.