ICYUMWERU CYA GATANDATU CYA PASIKA 2011A

ICYUMWERU CYA GATANDATU CYA PASIKA
29 gicurasi 2011 Umwaka A


Intu 8,5-8.14-17
1Pet 3,15-18
Yh 14,15-21
«Niba munkunda koko, muzubaha amategeko yanjye. Nanjye nzasaba Data, azabahe undi muvugizi, uzaza kubana namwe iteka». Amasomo y'iki cyumweru aradufasha kwitegura umunsi wa Penekositi tuzahimbaza mu byumweru bibiri biri imbere. Igitabo cy'ibyakozwe n'intumwa kiratubwira uburyo intumwa zaramburiye ibiganza ku bemera bo muri Samariya maze Roho akabamanukiraho. Uwo Roho niwe udaha imbaraga n'ubwenge kugirango tubashe gusobanukirwa n'ibyo twemera kandi duhore twiteguye gusobanura impamvu y'ukwizera kwacu; Petero arabisobanura neza mu isoma rya kabiri. Aha niho Kristu ashaka ko tugera: kumumenya no gukomera ku bumwe bumukomokaho. Ibi abakristu bashobora kubikora ku buryo bubiri. Ubwa mbere ni ukwakira Kristu mu buzima bwacu, tukamumenya kandi tukamukunda. Ubwa kabiri, ni ugukundisha Kristu abatamuzi n'abari mu ngorane zitaborohereza kurangamira ineza n'impuhwe by'Imana. Uyu ni umurimo wa Roho Mutagatifu kuko ni umuvugizi, umwunganizi n'umurinzi wa Kiriziya n'abayo. Tumenyereye ya mvugo ko uwemera Kristu abera abandi Kristu kuko imigenzereze ye iranga iya Kristu kandi ikaganisha kuri Kristu. Na Roho ni kimwe. Uwahawe Roho wa Nyagasani, ahinduka umuvugizi w'ineza y'Imana mu bandi. Ibi bituma twumva neza amagambo ya Pawulo mutagatifu: «Haragasingizwa Imana, Se w'Umwami wacu Yezu Kristu, Umubyeyi w'impuhwe zose kandi utanga ihumure ryuzuye. Ni yo iduhumuriza mu magorwa yacu yose ikaduha natwe guhumuriza abashavuye bose, ubagezaho ihumure twiherewe n'Imana» (2Kor 1,3-4), kimwe n'ayo dusoma mu gitabo cya Izayi umuhanuzi: «Nimuhumurize umuryango wanjye, nimuwuhumurize –ni ko Imana ivuze-» (Iz 40,1). Ibi nibyo abakristu ba mbere bakoze kandi na n'ubu ni byo bigomba kuranga abemera. Kwigiramo ineza, ukwizera n'ihumure dukesha ko tuzi Yezu. Gutanga ihumure rituruka ku Mana ni ugukurikiza amategeko ya Kristu ari yo kumukunda no kumukurikiza, gukundana nk'uko yadukunze. Ng'iyi imetero dupimiraho ko tuzi Imana. Yakobo intumwa abisobanura mu yandi magambo ati «niba umuvandimwe wawe cyangwa mushiki wawe bambaye ubusa, cyangwa se badafite ibyo kurya bya buri munsi, maze muri mwe hakagira ubabwira ati "nimugende amahoro, mwote kandi muryoherwe", atabahaye ibibatunga, byaba bimaze iki?» (Yak 2,15-16). «Unkunda, azakundwa na Data, nanjye nzamukunda kandi nzamwiyereka». Yezu ntadusezeranya amabonekerwa -usibye ko atatugwa nabi-, aradusezeranya kutuba hafi no kunganira imbaraga zacu kugira ngo tube abahamya n'abagabuzi b'ineza ye. Aradusezeranya Roho Mutagatifu, mbaraga z'abemera kugira ngo tugire koko ukwemera gushyitse gushyigikiwe n'ibikorwa biranga abemera. Ya mvugo ngo mu kiriziya ndagerageza, iyo mfite akanya njya mu minsi, siniba, sindoga, ayo hari uko meze mfasha abakene...ntiyagombye kugira umwanya mu buzima bwacu niba koko tugengwa na Roho wa Kristu kandi niba dukunda Kristu koko.
Reka nsozereze kuri iri sengesho rya Roho Mutagatifu:
Ngwino Roho Mutagatifu
Ngwino udutoze umuco wo mu ijuru
Ngwino Mubyeyi w'abakene
Ngwino Soko y'ibyiza
Ngwino Rumuri rw'imitima
Uri Umuhoza usumba byose
Mbera Umushyitsi muhire
Uhumurize umutima wanjye.
Ni wowe buruhukiro bw'abarushye
Ni wowe umara inyota abayifite
Ni wowe uhoza abarira
Ni wowe uhabura abahabye
Ni wowe Rumuri ruhire
Rwuzuze mu mitima y'abakwemera.

ICYUMWERU CYA GATANU CYA PASIKA 2011A

ICYUMWERU CYA GATANU CYA PASIKA
20 MATA 2008 UMWAKA A


Intu 6,1-7
1Pet 2,4-5
Yh 14,1-12
«Ntimugakuke umutima. Nimwemere Imana najye munyemere». Mbere yo kutwitangira ku musaraba, Yezu yahumurije intumwa azimeneyesha ko umwemera atagomba guhungabana kuko niwe «nzira, ukuri n'ubugingo». Imyaka irarenga ibihumbi bibiri Yezu avuze ariya magambo, nyamara uyumva ubu yagirango nitwe yabikiwe. Amasomo y'iki cyumweru aragaruka ku ngingo yo kwemera Imana no gukomeza ukwizera. Inkuru nziza dukesha Kristu ni iy'ukwizera nk'uko Pawulo mutagatifu yabyandikiye Timote ko nidukomera ku nyigisho ya Kristu tuzasangira umurage w'ikuzo mu ijuru (2Tim 2,11-13). Ese koko ubu twavuga ko ukwizera cyangwa ukwemera ari ngombwa? Ubu abantu turacyafite umwanya wo kwiringira ibizaza kandi ikoranabuhanga na vision twenty twenty bitwizeza ibitangaza? Wenda iwacu ubukene ntibubitwemerera n'ubwo bitabuza abifite kugaragaza umutungo wabo mu bikorwa bitangaje bitatse imigi yacu, ariko abakataje barabura gato ngo isi y'ejo izabe ituwe n'abantu basukuye, batunganye kandi batagira icyo baniha kuko ibyuma kabuhariwe bizaba byabaremye bibyitondeye. Ako kabura ariko karakora ishyano kuko ni ubwo iryo kataza rihira bamwe, abandi barigwamo. Urugero ntiruri kure 20% y'abatuye isi batungwa n'ibirenga 85% by'umutungo w'isi naho 80% bagasaranganya ibisigaye. Inka yo muri Yapani itungwa n'amadolari 10 ku mu nsi mu gihe iwacu abarenze icya kabiri y'abaturage batabona idolari rimwe. Imiryango itatu y'abanyamerika ikize cyane ki isi, ifite umutungo urenga ingengo y'imari y'ibihugu 45 by'iwacu iyo. Umukinnyi wa ruhago, Fabrizio Miccoli, ukinira Palermo, uherutse kugura iherena rya Maradona ku mafaranga 25.000€. Hose ariko ngo ntaho bukicyera. Umukene aba abara iminsi, naho umukire abona ibintu byuzuye ariko ntashira ipfa, ndetse n'intimba bigeretse cyane iyo yibutse ko ntawe abisigiye kuko yabyara atabyara, imisazire y'abo baminuje iteye agahinda, dore ko bamwe bageza aho basigara bizeye imbwa, injangwe cyangwa akandi kanyamaswa babana, kuko abantu nta mwanya baba bafite. Urugero ni umusaza w'umuyahudi ngo wakundaga gateau, maze igihe yendaga gupfa akikijwe n'abe, yumva impumuro yayo. Asaba ko bamuha agace agapfa asezeye. Umugore yagiye kuyizana aratungurwa kuko umwana wari wayiteguye yanze kuyimanyura ngo kuko bari kuyirya nyuma y'ishyingura. Abantu bakeneye inkuru ibahumuriza, abakene bakizera kutazapfa nk'ibimonyo n'abakire bakareka gupfana intimba. Isi ikeneye uyereka inzira nyayo aho guhora tubeshywa ngo hakurya hariya havumbutse umukiza, waba utarahagera ngo n'inyuma y'urugo iwawe barakiza, maze abantu b'intege nke, ndavuga iz'umutima, bagahora bazutaguzwa boshye wa muvumbyi... Isi ikeneye ikimenyetso gifatika ko kubaho bifite agaciro kuko bidufungurira inzira itujyana kwa Data mu ijuru. Abato n'abakuru bakeneye kumenya ko kubaho nyakwo bisaba kugira gahunda ifatika idashingiye ku byo radiyo yaraye ivuze cyangwa amashusho ya tv yerekanye. Ngo abahigi benshi bayobya uburari. Siko kiriziya iteye; ijambo yamamaza si iryayo ahubwo ni irya Kristu. Ng'ubwo ubutumwa papa Benedigito adasiba gushimangira mu nyigishoze. Kristu agomba kwamamazwa ku buryo bunoze kugira ngo umwemera amumenye, yoye kumwitiranya na za baringa, utaramumenya ashobore kumumenya n'abamutaye bamugarukire. Utabishaka nawe yoye kugira urwitwazo ngo byose ni kimwe, amadini yose avuga bimwe, no mu mutima wanjye nasenga, n'andi magambo nk'ayo. Ntibihagije ariko kuvuga no kwamamaza Kristu, kuko nawe gihamya y'ibyo yavuze n'ibyo yakoze twayiboneye mu rupfu no mu izuka. Abamwera tugomba kurangwa n'ubuzima bukurikiza Kristu: mu gusenga no mu guhabwa amasakaramentu, hato ngo tutagwa umudari; mu kwitangira abandi kugirango bemere ko ibyo twamamaza ari ukuri; mu kwicisha bugufi no kwirinda kurengera (discrétion et modération). Ikigomba kuduhihibikanya ni uko Imana ihererwa ikuzo mu mibereho yacu ndetse na muntu yaremye mu ishusho yayo, iwacu akahabona uwanya n'uburyo bwo kwiringira Iyamuhanze. Ubwo buri wese yareba ku buryo bufatika, uko ukwemera kwe kwahinduga gahunda y'ubuzima bwe kuko ukwizera ntigutamaza (Rom 5,5). Imana iragahora isingizwa iteka ryose!

ICYUMWERU CYA KANE CYA PASIKA 2011A

ICYUMWERU CYA KANE CYA PASIKA
15 gicurasi 2011 umwaka A


Intu 2,14a.36-41
1Pet 2,20b-25
Yh10,1-10


Icyumweru cya kane cya pasika ni icyumweru cy'Umushumba mwiza nk'uko ivanjiri ya none ibitubwira. Yezu wazutse niwe Mushumba witangira intama ze ngo zigire ubugingo. Iyi vanjiri yumvikana neza iyo uyisomye abonye n'akanya agasoma umutwe wa gatandatu wo mu ivanjiri ya Yohani, aho Yezu asobanura ko ari we Mugati utanga ubugingo kandi umugana azabaho ubuziraherezo. Ubwo buzima bushya, Kristu abugereranya n'uburyo umushumba yita ku bushyo ashinzwe. Iyi vanjiri ya none iragereranya umushumba muzima n'umujura. Umushumba mwiza yinjirira mu irembo, ntamene urugo; azi itama ze kandi nazo zikamumenya kuko azihamagara zikamukurikira; umujura intama ziramwishisha kuko zitamuzi; umushumba mwiza yitangira intama ze iyo hari igishatse kuzihungabanya; umujura we agenzwa no kwiba no kwica. Birumvikana ko Yezu ariwe Mushumba nya mushumba nk'uko tubiririmba muri Rata Siyoni, ya ndirimbo yo ku munsi w'Isakaramentu ritagatifu. Niwe wemeye guhara amagara ye kubera twe, yaramiye abashonje igihe atubuye imigati. Yateye ineza n'ibyishimo abari bari mu kaga azura abapfuye, akiza abarwayi, ahindura amazi divayi. Yararuye abari barihebye amanura Zakewusi mu giti, yarura mu nzara z'abafarizayi wa mugore wari wafatiye mu busambanyi, aha agaciro abasoresha n'abagore b'amahabara. Ntaho yiganyirije kujya igihe cyose hari umuntu ukeneye impuhwe z'Imana kandi nibyo kuko Umwana w'Umuntu atazanywe no kugaragirwa ahubwo no kuba umugaragu wa bose. Uwo murimo wo kuba umushumba, Yezu yawuraze abe ubwo yababwiraga ati "uko Data yantumye, nanjye ndabatumye"(Yh 20,21). Ku buryo bwumvikana neza, ababatijwe bose ni abashumba muri Kiriziya y'Imana ni ubwo ku bw'umwihariko hari abahamagarirwa kuba abayobozi. Abo ni intumwa n'abasimbura bazo. Abajura n'abambuzi nabo barahari. Abo ni abiyitirira ubutumwa naho ari inda yabo baharanira; ni abahanurabinyoma, ab'ibyaduka bihangishaho ngo Imana yaraye ingoboreye ibanga kandi ari mpemuke ndamuke; ni aya madini yiyitirira shitani (wenda iwacu ntarahagera, ariko ntacyo abazungu batazatuzanira, nayo tuyitege!). Yezu ati" muritondere abigishabinyoma babasanga, inyuma basa n'intama, naho imbere ari ibirura by'ibihubuzi"(Mt 7,15). Ubwo nateruye mvuga abashumba, reka mvuge gato ku bashumba ba none. Bamwe umurimo bakora ntibawujijukiwe cyane ku buryo ubabona yacyeka ko atari Kiriziya ya Kristu bakorera. Abo ni abitwaza umanya bafite muri Kiriziya maze bagakora indi mirimo ibahesha inyungu n'ibyubahiro. Hari abafite ukwemera guke bityo ijambo bigisha rikabura ireme kuko rimera nka ya cyuma kibomborekana Pawulo mutagatifu avuga mu gisigo cy'urukundo (1Kor13,1). Hari n'abatinyisha ya mvugo yo hambere ngo "tinya Imana, tinya umuriro", bakananirwa gusobanura neza Ijambo ry'Imana maze bagahagama mu kuvuga ngo ibi sibyo kuko ariko Kiriziya ibyigisha. Abakristu bakeneye imvugo isobanutse ishingiye ku ijambo ry'Imana , iyi ifasha umuntu kubona urumuri bityo agashobora guhitamo icyiza akirinda ikibi.Abo ni abatinya kuvuga ijambo ry'agakiza nk'iryo Kristu yamamaje ngo hato batiteranya cyangwa bagakoma Rutenderi: ngo mbwiye bariya bashyira gahunda zose ku cyumweru bakibagirwa misa ko iyo hatabaho izuka icyo cyumweru bari kukivana he! Bariya baca inyuma bagenzi babo ngo akadakora umwe ntikica ubukwe. Bariya basore n'inkumi bahinduye ijambo ry'Imana maze umuco w'ubusugi, uyu usaba abatararushinga gutegereza uwo munsi Imana izabagenera, kubibutsa kongera gusubiza iryo jambo mu buzima bwabo kuko abenshi baricishijemo akarongo. Bamwe basigaye baca umugani bihimbiye ngo urukwavu rukuze bararurya kandi ibyo ntaho byabaye. Ariko n'ubushyo bw'ubu si shyashya: hari abapfa guhomerera bagakurikira umuhisi n'umugenzi ngo gaho arababwira agakiza bakibagirwa ko ntawe ubona isha itamba ngo ate urwo yari yambaye. Aba baherera mu kugaya no kunegura imikorere ya Kiriziya, inkunga yabo ikaba iy'amagambo gusa. Abakeka ko Kiriziya ari CARITAS gusa, imfashanyo yaboneka bagatora akambaro, yaba ntayo bakavunurira mu zindi nsegero. Abibeshya ko ineza, amahoro n'abutabera bireba bamwe gusa, kwitangira abandi bikaba byaribagiranye mu buzima bwabo. Kristu niwe Mushumba mwiza, tumugane kandi tumutakambire ngo atuyobore koko; tumusabe aduhe imbaraga z'mutima kugira ngo abo dushinzwe tumenye tubayobora ku Mushumba mwiza, kandi ngo atwoherereze abashumba babereye umuryango we Kiriziya.

ICYUMWERU CYA GATATU CYA PASIKA 2011A

ICYUMWERU CYA GATATU CYA PASIKA
08 gicurasi 2011 Umwaka A


Intu 2,14.22-28
1Pet 1,17-21
Lk 24,13-35
Ivanjiri y'abigishwa bajyaga Emawusi iradufasha gusobanukirwa n'izuka rya Kristu no kumenya agaciro k'ubukristu bwacu. Ijambo umwe mu bigishwa yabwiye Yezu rirasobanura ku buryo bunoze uko intumwa zari zimeze mbere yo kumenya no kwakira inkuru y'izuka rya Yezu: «twebwe ho twari twarizeye ko ariwe uzarokora Isiraheli, none...». Kabone n'ubwo Yezu yakomeje kugenda abasobanurira ibyanditswe, bariya bigishwa bari bacitse intege dore ko bari biyemeje kwisubirira iwabo. Nyuma aho bamaze kumumenyera mu imanyura ry'umugati, ikimenyetso yasigiye abe ubwo yababwiraga ati: «ibi mujye mubikora bibe urwibutso rwanjye», bashimishijwe n'uburyo Yezu yari yabahuguye, bityo binababera impamvu yo guhita bajya gutangariza abandi iyo neza Imana yari yabagiriye yo kubarinda kwiheba. Ni mugihe kuko Petero mu ibarowa ye ya mbere, aratwibutsa ko twarokowe n'amaraso y'agaciro gakomeye ya Yezu. Uwaducunguye, uwemeye ko amaraso ye amenerwa ku musaraba, siwe wahindukira ngo ashimishwe no kubona duheranywa n'icuraburindi ry'icyaha. Intego ya Yezu ni iyo kudufasha kumenya Imana, kumenya ineza yayo, no kuba abahamya y'iyo neza mu bantu. Intego y'Imana mu Butatu butagatifu yari ukugirango isi n'abayituye bisubirane bwa busabane Imana yabihanganye, cyane cyane muntu ashire ubwoba maze yoye kwihisha yumvise Imana imugana nk'Adamu na Eva muri Edeni, cyangwa ngo Gahini abe yakwica umuvandimwe we kuko yumva afite ipfunwe ryo kudashyikirana n'Imana. Iyo si itarangwamo inabi, isi itunzwe n'ijambo ry'Imana n'umubiri n'amaraso by'Umwana wayo, isi itwikiriwe n'igicucu cya Roho Mutagatifu. Kugira ngo ariko tumenye Imana n'ineza yayo, kugirango tudahora mu icuraburindi ngo bituyobere kandi Yezu aduhora hafi mu rugendo rw'ubuzima duhoramo, hari intambwe ishatu tugomba gutera. Iya mbere ni ukumva ijambo ry'Imana. Ngo Yezu yagendaga abasobanurira ibimwereye. Ubukristu si igitekerezo nka kimwe cy'ikibuguzo cyangwa amajanja y'imbwa za Ruganzu. Ubukristu si ibitekerezo twumva mu maradiyo cyangwa mu biganiro aho abazi kuvuga no kuganira bateranira. Ubukristu ni ubuzima twigira ku ijambo ry'Imana. Umwarimu w'ubukristu ni Kristu nyirizina. Kudafata akanya ko kumva ijambo ry'Imana nyuma tukarenga tukirahira ngo turi abakristu ni ukwigerezaho no kwibeshyera. Ntibitinda kugaragara ko ubukristu bwacu nta shingiro bufite ndetse tukanata tukisubirira iwacu nka bariya bigishwa ba Emawusi. Intambwe ya kabiri ni ukutibagirwa ikimenyetso Yezu yadusigiye: imanyura ry'umugati, Ukarisitiya. Kutajya aho umuryango w'abemera Yezu uteranira ngo dusangire n'abandi Ukarisitiya, twunge ubuzima bwacu k'ubwa Yezu bisa no kuba nko kuvomera mu kiva. Ukarisitiya niyo itugira umuryango umwe kuko ituma duhinduka koko umubiri wa Kristu tukunga ubumwe hagati yacu. Aha niho dukura imbaraga zo gutera intambwe ya gatatu yo gutanga ubuhamya dukomora ku ijambo twakiriye n'umugati utubeshaho. Kubaho nta bikorwa biranga ubuyoboke bwacu ntibibaho. Burya ntituba turiho, bambe dushinga. Ngo abigishwa basubiye i Yerusalemu kwamamaza ko Kristu ari muzima. Ngiyo ineza dukesha Yezu, ineza tugomba kwamamaza. Yezu Nyirimpuhwe, kiza u Rwanda n'abanyarwanda kandi wakire roho z'abanyarwanda bose bapfuye n'abapfa bazize kubura urukundo n'impuhwe by'abavandimwe babo.